هحكي واسمعوني


.








يمكن انا انقطعت عن التدوين من فتره كبيره اوي


وكنت دايما معاكوا وبعرفكوا اخباري

بس بعد اخر موضوع ليا وهوا اني اشتغلت

انا فعلا اشتغلت وسبت الشغل بعدها بشهر

لان نظام المدارس الخاصه كان بينصف الطالب عن المدرس


بس اهم حاجه حصلتلي في فتره الانقطاع دي


ويمكن الي محدش يعرفه عني

ان الحمد لله بعد فتره 4 سنوات


ربنا كرمنا انا وشريك عمري بالارتباط

وده بعد ماكانت اهالينا رافضه الارتباط ده نهائي

وده عشان كان فيه خلافات بين العيلتين

وكنت تقريبا في الفتره الي فاتت دي شبه ميته

وكنت دايما بدعي ربنا انه يكون نصيبي وشريك حياتي

وكان عندي امل في ربنا كبير


رغم ان كل حاجه كانت بتقول لا

لا مينفعش نرتبط

لا حبنا مش هيكمل

وان مفيش حل الا الفراق

كسرني اللفظ ده اوي

وهوا نفسه خاف عليا وفضل الانسحاب من حياتي

بس انا برضه كنت متمسكه بالامل الي انعم بيه ربنا عليا

وفي يوم وبدون اي مقدمات وفجأه

جالنا تليفون

وكانت والدته بتطل ميعاد تزورنا فيه عشان يخطبوني

بصوا بقي انا مش هخبي عليكوا

انا اصلا بعد المكالمه اغمي عليا

ولولا الحركه الااراديه دي

مكنش اصلا بابا وافق

وسبحان الله لقيت كل حاجه  بتم بسهوله رهيبه

وعرفت ان دي حكمه ربنا

سبحان من يقول للشئ كن فيكون

انا عايزه بس اقول لكل حد عنده حلم يتمسك بيه

ربنا هيختبرك وهيختبرك

لحد مايعرف اد ايه انت عايز ومتمسك بالحلم ده

وادعوا ربنا اوي

والله الدعاء مفتاح كل حاجه

اتمسكوا بالامل وبالحلم

واعرفوا ان ربنا كريم اوي


بجد ربنا كريم اوي

19 تعليقات على : “هحكي واسمعوني”

  1. لالالالا بجد خبر جاااامد جدا جدا
    فعلا الصبر مفتاح الفرج كمان النصيب النصيب النصيب
    ربنا يكرمك يارب ويفرح قلبك ويسعدك دايما
    بجد سعيده جدا عشانك ربنا يتمملك بخير

  2. ديالا يقول :

    ايه رايك بقي انا بتاعت المفاجات اساسا

    ده انا نفسي اتفاجات

    بجد الدعاء والصبر مفتاح كل حاجه

    ربنا يخليكي ياقمرايه

    يارب افرح فيكي يارب قريب باذن الله

  3. Kiara يقول :

    البوست دا اداني امل في الحياه

    ربنا يكرمكم ويجمعكم في حلاله يارب علي كتابه وسنة نبيه

  4. moory-mero يقول :

    السلام عليكم و رحمة الله و بركاته
    انا كمان بعيده عن التدوين من فترة كبيرة او يمكن كرهته وقرفت من اللي بيحصل فيه بس اول ما انتيمتي بعتتلي اللينك اقراه موش تتصوري سعادتي اد ايييييييييييييه
    اني كده ماشية صح ومتمسكة بالانسان اللي بحبه رغم كل الرفض والاستحالات اللي ادامنا بس دايما عندي ثقة في ربنا انه ليا ان شاء الله
    فيارب افرح زيك كده ووخطوبتي او جوازي منه يكون قريب اللهم آمين والبت انتيمتي هي كمان عشان زيي
    الاهل بجد ربنا يهديهم
    حقيقي فرحتلك وحاسة بيكي لاني لسه عايشة في نفس المأساة موش كنت بموت بل مت فعلا وسبحانه المنجي في اخر لحظة كان القلب يستجيب تاني
    نشكر ربنا على كل حال وهو قادر على اي اهل وان شالله يارب يجمعني باحمد عن قريب اللهم آمين ويفرح بنات المسلمين ياارب

    والله فرحتلك ولو عليا هاين عليا ازغرطلك حاساه فرحي انا
    ربنا يسعدك معاه ياقمر ويتمملكم بخير يارب

    في رعاية الله

  5. ديالا يقول :

    كيارا

    والله بجد الامل كبير اوي طول ماحنا عايشين


    ربنا يفرحك يارب

  6. ديالا يقول :

    moory-mero

    بصي انتي استحاله تتصوري انا تعبت اد ايه

    كل يوم كنت بحس ان حياتي بتتسحب مني

    واني فعلا بحتضر

    وكل ماافكر اني ممكن اكون لحد تاني او هوا يكون لحد تاني غيري

    كان الاحساس ده بيشلني

    وكان الرفض صعب اوي وكل الناس اتحايلوا علي اهالينا عشان يوافقوا

    كانوا بيرفضوا اكتر واكتر

    بصي كنت ممكن افكلا ان فلسطين تتحرر اما انا فلاااااااااا

    وسبحان الله الدعاء ثم الدعاء


    كنت بقول يارب لو خير قربه ليا ولو شر اقلبه خيروقربه ليا

    وكان عندي الثقه في ربنا وجالي عرسااااااااااان كتير وكان في ضغط رهيب وقلت استحاله اتجوز حد وقلبي مع حد تاني دي خيانه للاتنين

    والله بدون اي مقدمات ربك حلها باسهل الطرق ودلوقتي اهلي بيحبوه اوي واهله بيحبوني جدا يارب عقباالك بي طمنيني عليكي

    بجد شرفتيني

  7. ديالا يقول :

    moory-mero


    عارفه كمان وقت ماربنا يكرمكوا هتنسي كل الي فات انا نفسي بحاول افتكر الصعوبات مش عارفه افتكرها

    اوعي تتخلي عنه ولو سابك عشان خايف عليكي اوعي تسبيه

    انتوا طالبين الحلال يعني ربنا معاكوا واوعي تقنطي من رحمه الله

    وتقولي استحاله

    مفيش استحاله طول مالدعاء موجود ربنا هيستجيب

    خليكي واثقه في الله وف حبك

  8. rack-yourminds يقول :

    فعلا بالدعاء والصبر والاراده هنحقق احلامناوينكسر المستحيل

  9. سلام عليكم يا عسل ^_^

    انا لسه جديدة بالتدوين لسه مكملتش السنه

    ودي اول زيارة لي هنا و إن شاء مش الاخيرة ,

    سعدت بسعادتك ربنا يسعدك يارب

    ويوفق الجميع ... ^_^ وانا معاكي ان ربنا كريم

    وما خاب من اتكل عليه ووثق بيه ^_^

    اعذب تحية وعقبال الزواج يارب ,

  10. مبروك
    بارك الله لكما وبارك عليكما وجمع بينكما فى خير
    فعلا \
    التمسك بالامل والسعى الى تحقيق الحلم
    حاجه حلوة خالص
    بس اقولك على حاجه بجد
    ما دام الراجل مصمم على موافقه الاهل يبقى ميه ميه
    ربنا
    يوسع عليكم يارب
    ونفرح
    بيكم

  11. مها البنا يقول :

    أنا رديت ع البوست ده

    بس لقيت الرد منشور فى البوست اللى فات :)

    اصلى متعوده ان الرد والتعليقات بتكون فى اخر البوست مش اوله

    على اى حال


    حمدلله على سلمتك يا ديالا .. والف مبروك :)

  12. شوكولاتة يقول :

    مش ممكن يا ديالا بجد وحشتينييييييييييييييييييييي اوييييييييييييييييييييييييييييييي ومش قادرة اصدق انك رجعتي وانتي تقوليلي فاكراني انا منستكيش اصلا واكتر حاجة فرحتني في رجوعك اني اتطمنت عليكي ان الحمد لله اللي كان باعدك عنا خير وربنا يسعدك مع شريك حياتك ويكون اختيارك اختيار موفق وربنا ينعم عليكي بالسعادة والحب

    أموووووووووووواااه

  13. حمدالله على سلامتك نورتى مدونتك من تانى ومليون مبروك الخطوبه ويارب يتممها على الف خير وفعلا لاذم نتمسك بحلمنا وربنا قادر على كل شىء سعدت برجوعك تانى بس سؤال هو ليه مرجعتيش لمدونتك الاصليه وعملتى مدونه جديده ؟

    تحياتى
    توتا

  14. Heba Gamal Emara يقول :

    بجد يا ديالا خبر جميل جدا جدا جدا
    وألف ألف مبروك وربنا يتمم لك ع خير يا حبيبتى ... وتعيشوا دايما ف سعادة و هنا

    ويكرمك بالذرية الصالحة ان شاء الله

  15. انا كنت كاتبه تعليق هنا ههههههه

  16. شوفتى طلعت كاتباه فى البوست اللى فاته ههههههه
    وحشااانى كتير
    اول ماعرفت انك رجعتى جيت جرى :)
    نورتى تانى ياقمر
    انا كمان لسه راجعه وكنت زعلانى ان اللى بحبهم سابو التدوين
    يلا عايزينك كدا تملى المدونة دى بوستاات
    وانا هضيفك عندى وهتلاقينى فوق راسك كل شوية هههههه
    اوعى تغيبى تانى
    اوعى تكونى مش فاكرانى هههههههه
    همسات على ضوء القمر :):)
    تحياتى

  17. شاب فقرى يقول :

    ألف مبروك الإرتباط
    وحمدا لله بالسلامة للتدوين
    وتتعوض ان شاء الله فى عمل احسن من اللى فات
    بالتوفيق يارب دايما
    ونعم بالله
    فعلا كل حاجة إبتلاءات من ربنا
    خالص التحية والتقدير والاحترام
    شاب فقرى

  18. david santos يقول :

    Really excellent posting and very cool blog. Congratulations. have a nice day!

  19. غير معرف يقول :

    مرحبا يا أصدقائي، كم هو رائع للعثور على المواقع الخاصة بك مع هذا. تهانينا لعملكم الشاق، وأنا يلي.
    وأغتنم هذه الفرصة أود أن أشاطركم لدينا
    بلوق. ونحن سوف نكون سعداء لزيارتك ومعظمها لا يزال متابعة منا.

    نحن نتطلع زيارتك

    تفضلوا بقبول فائق الاحترام

    Josiel أيام
    http://josiel-dias.blogspot.com
    ريو دي جانيرو

اترك تعليقا

 

Design By:
SkinCorner